manchmol hab i ds schreibfieber, dann sprudelts raus
a paar zeila vom theater, weil do kenn i mi aus
i hab a weng dichtelt, drom horchat zua
beim vorlesa brauch i a bissle an rua


dr hans ghört scho zum invendar
managt alles, ganz ond gar

egal, was ma braucht ond was o fehlt
der schuit koi zeit ond o kei geeld

bsorgt möbel, tapeta, d moler drzua
des muaß scho passa, soscht gitt er koin rua

a kich, hender tapfe hot ma dia gholt
dr karl hot a blende untarom macha gsollt


d heike näht vorhäng, machts rauf, machts ra
nocht miassat no andre rengla na

do fehlt no a blom, a bild, a uhr
der tisch unmöglich, der briecht a kur

a scheens tischtuch muaß d heike beim eska koffa
so, allmählich ko ma des bühnabild lossa


ma muas scho saga, alle dent mit
am end isch die bühne a richtiger hit

dann wird probt, auf teifel komm raus
a paarmol en dr wuch en des sportheim naus

überall bücher, grea ond blo
hentadrauf schreibt ma termine no

welchas isch deins ond welchas ghört mir
hab d texscht none glearnt, ko o nix drfir

so plogt ma se rom, tuat improvisiera
dr alois ond heike deant no net kritisiera

zerscht stod des learna, dann kommt erscht ds spiel
jetzt dent halt drzua, zeit isch nemme viel!

kalt isch do abbel, do holsch dr d tod
an schnaps her, den trink mr in osra not

oiner, des wars, weil net feiertag isch
dr chef mogs net, wennd an dr arbeit halb gsuffa bisch

bisch selber chef, tja, des macht was her
dann trenksch halt sell odr jenes no leer


dr andr, dr joachim woiß a wia mas macht
am beschta, es ghert dr bloß 1 flasch pro nacht

verduschta muaß der trotzdem net glei
der schütt se halt s bier von de andre mit nei!


dia zigaretta, des giftzeig, mei wia des stenkt
hot gar koin wert, wenn mei pulli daushengt

mei gwand schmeiß i glei end wäschmasche nei
grocht wird do daus, des isch a saurei!

ab nexter wuch gots mir widder guat
weil dann koiner mehr mit mir rocha tuat

vielleicht trifft ma se ja, mol hier mol do
stod mitnand zu am schwätzle no

egal, wer mi trifft, lond me net hänga
dent mir bittschea a zigarett aufdränga!


dr alois hockt nemme en den kaschta na
do isch ihm z kalt. do frierts ihm was a

heike isch do fei scho recht schlau,
hot kisse und heizdeck als unterbau

i hoff bloß, du willsch di hier net schleicha
mach du nor no weiter, brauchsch no net weicha

dei ratschläg send wichtig, os horchat scho na
ma setzt s ja o om, so guat mas halt ka.


(ond jetzt kommt was fürn dominik)

a paar kloinigkeita senn end hosa ganga
weg mitm texscht, bleibt oifach hanga

des war ihm arg, mei war ihm des peinlich
des publikum isch do net so kleinlich!

koiner hots gmerkt, grad no egal
dr schappi aber, der war ganz fahl

em kämmerle henta , war er nocht ghockt
selber von sich am ärgschta gschockt

phh denk an d karl, der verdreht was nor got
koi mensch hot a ahnung, wo des em büchle stodd!

ond, wie er so tanzt, oser schappi, net schlecht
ihm selber ischs halt no net so recht

drom hängt er se henda an jürgen na
und hofft, dass der ehm was beibrenga ka

mit der susi tanzt er ganz couragiert
so dass dia fascht ihra hos verliert

andre miassas ihr saga: ziag dei hos jetzt nauf,
wia loffsch denn rom! du fällsch ja scho auf!


d carmen, des küken, macht se net schlecht
wird langsam laut auf dr bühne, des isch scho recht

i verstands eh net, was dia abbl so dämmt
noch m auftritt isch dia völlig ungehemmt

o hendr dr bühne isch s koi bissle nervös
kennt von alle d text, glaubat mer des!

a bissle was trinka, i hab ja no zeit
dann a zigarett, isch no lang net so weit

d kollega miassas störa en ihrer rua
jetzt gang amol du mit deim köfferle zua

zmol wirds hektisch und zeit wird knapp
jetzt got dia carmen wia a rakete ab

nom om dia bühne, im schnella saus
ganz außer puste packts dia unterwäsch aus!


ond jetzt zur monika, meim oigna keed
dia ko was! dia isch ja schließlich net bleed

dr karl isch der vater ond i benn d muater
nemmers halt mit auf bühn, osr luader!

reißt an dene kerl rom, des isch a pracht
was dia wohl em richtiga leba so macht?


dr jürgen, a berliner wie alle johr
en jedem stück kommat halt preißa vor

wahrscheinlich isch es beschlossana sach
nächstes johr hoißt wieder statt griaß di „ tach“

am allerbeschta gfällt mir des bild
wien er dobstodd, sei hoor ond sei blick ganz wild

verwirrt ond zamgnoddelt von der susi
überall lippastift abdrück vom gspusi

des isch so herrlich, des gfellt mir so guat
wenn a mädle an kerl so hernemma tuat!


do spielt der quetschn ond so schea gitarr
ond stellt se beim senga a, grad wia a narr

wochalang stellt er se a, aber wia
ma hot scho denkt, des ko der nia

inzwischa kriagt ers ganz ordentlich na
siggt ma halt, das ma alles learna ka.

a bissle schlecht drauf war er scho zwischanei
beim paddy spielt do gar vieles mit nei

drhoim an ärger, vielleicht o em gschäft
vielleicht hot er o oifach net so defft

wie ers halt geara hätt, wer woiß nocht des
aber morga hosch urlaub, des isch doch was schees!

losch heit halt wieder mol dia sau richtig raus
do gots dir nocht gut, bisch nemme schlecht drauf


schade, dass i morga schaffa muaß
i ko bezeit ganga mit am scheana gruaß!


zur oma was sagat ihr nocht zu der?
so a hoisfahrt mädle macht scho o was her!

mit dem stecka, deane hoor ond mit ihrer brill
ob dia ihr michael wohl soo will?

nochm spiela, siggsch der ihr alter net o
danzt, ond zwar isch do jeder mol dro

do wird dreht ond gwendet, schnell no a figur
schee zom zugucka, do staun i nur

tja sonja, des wars wieder für a johr
daß i di wo triff kommt eher selta vor

am eheschta hier in diesem hause
mach mer halt widder a jährle pause


d katja oser beschtes stück
dia tut en jedem theater mit

spielt soverän, egal welcha roll
spielt oifach so wia mas halt spiela soll

heier mim neglischee, vor alle leit
des isch fei scho a schamlosa zeit

do kennt katja nix, stod vorderscht na
wie ma nor so ogeniert sei ka!

huier hot katja oft kopfweh gehett
dia hot mim joachim scho a gfrett

der würgts mitm strick, reißt ra hendr ihrn kraga
beim benda vom duach. des sollt der karl mol waga

sicher isch, dass des publikum lacht
do hot dr karl no net s maul aufgmacht

zung nei en d backa ond oga rolla
dann a paar wort, dia gar net komma solla

neglischee, neglischee oder sotte sacha
d leit tuts gsicht scho wea vor lacha

mei ond danza ko der, do gots mir guat
scho schea, wenn oiner net abbel maula tuat

über mein tanzstil, mei hüfte, mei händ
do hot dr wenzel probleme, aber der spennt


dr joachim, mei wia der des hasst
wenn net überall alles passt

schublad isch neigricht, do fehlt se nix
bier für d bühne ond fisch en dr bix

alles kontrolliert er, o d mikrophone
soscht heart ma d begrüßung net von oserm tone


nisane und susanne senn o drbei
dia brengat fön, kämm ond schmink-allerlei

senn zuständig für krampfodra ond für dia bärt
richtat frisura wie sies so ghärt

senn hendr dr bühne ond denkat mit
ond helfat wos was zum helfa gitt


theaterleit hab e durch, i benn fascht ferte
oiner ghert no agred, weil der isch di härte

dr luke hockt na off da boda von dr bühn
isch d rita drhoim, nocht wird er kühn

macht räde sprüch ond drenkt sei bier
zwischanei tanzt er dann no mit mir

wenns em dann langt, leggt er se oifach noch henda
was soll ma se ploga, was soll ma se schenda

des roicht no morga. en wald muaß er mit
do schafft ers nocht naus, do wird er scho fit!


jetzt benne ferte,mei gedicht isch aus
jetzt will e zom schluss nor a weng an applaus!!!

Gedicht Anhang

geschrieba von dr "Monika" (Susanne Minder)